Giovedì 12 settembre 2019 

Carissima S. e blog. 

                               ieri, xe sonà la canpanela anca pal Grupo de Letura, ghe so ndà, anca se presto so ndà via, parché dovevo ndare in ospedale. Go ritrovà tute e tose del'ano passà, e se ghemo saudà volentieri. La Luisa me ga dito che la ga conprà uno dei me libreti che go spanto de qua e de à par tentare de vendarli. El xe uno de quei che go scrito in dialeto - Na rina al giorno toe a Teresina da torno -,   Ela me ga dito  la se gode un pasto quando che lo lese., e  la me ga anca dito de scrivare senpre in dialeto. Carisimi, la Teresina davero, la xe drrìo vegnere vanti in pressa, me ne so incorto in te sti dì, che me fermo a pensare, pì del solito, cosa che go da fare. Questo n'ol xe un bel segnale, bisogna che fasa presto a rancurare tuto queo che go scrito e metarlo insieme n te dei libreti. Go trovà me fioso, che lavora in te na picola tipografia, ch'el me ne  fa poche copie, anca  una come sinquanta. Così me dago da fare su sto conputer rigenerà, che Sandro me ga portà. Un co vago in Domo al funerale de Federico, un bon toso de poche parole, ma tanto e tanto bravo a piturare, a fare de e bee  opare in ceramica, e a metarle ben in mostra, come a ultima volta pochi giorni fa su i scalini de San Paolo e nela fonta de Bota. A pora Nicoleta a resta sola, ma a sarà confortà da tanti amisi, che a se ga fato co a so bravura e a so gentilesa, anca mi, come che posso, sercarò de starghe vesin.

Se dise che morto un Papa

se ghe ne fa naltro,

ma quando che more un amigo,

se perde na man, come quela

de Federico, che co a Nicoleta

i faseva de tuto e de pì

par la nostra bela cità,

che la deventava ncora

pì bela, quando lori

i ghe meteva e man, co tute e bele robe

che i faseva.

Da un toco de tenpo 

Federico no stava ben,

ma morire così in prestesa

el ne ga assà tuti inbanbolà.

Caro Federico, sò sicuro

che te sì lasù, in conpagnia

dei to cari, e de to mama

che insieme a Nicoleta a ghi tanto rancurà. 

Ciao caro Federico, 

el PARON  te ga voesto in Paradiso

parché El ga visto che te sì bravo

e BON.