Giovedì 19 luglio 2018  

Carissima S. e blog.

                                  oggi compio 77 anni e il mio primo pensiero è quello di ringraziare con una preghiera EL PARON che ha voluto concedermi tutto questo tempo. Non so se ho fatto e mi sono comportato secondo i suoi insegnamenti, ma se ho sgarrato spero che mi perdoni. Un altro pensiero lo rivolgo a tutti i miei cari che non posso più vedere con gli occhi fisici, ma che continuo a vedere con gli occhi della mente e del cuore. Penso anche a tutti voi e se vi ho mancato di rispetto vi chiedo di perdonarmi. Ora  qui di seguito vi scrivo quello che penso della VECCHIAIA nella lingua che ho imparato dalla nascita...

     Quando che semo veci a ghemo paura de vardarse al specio, parchè a vedemo quante rughe che gavemo. Sentimo dei doloreti qua e la ogni matina. No volemo mai sentire parlare de la vecessa, ma in fondo in fondo a serchemo de stare insieme a queli che ga la nostra età. Parlemo volentieri dele robe de ieri e sui amissi che ne ga lassà, e speremo che a nostra ora la vegna senpre pì in la.

  On co semo in te ‘na società tecnologica che vive par fare e par godare. Par nialtri veci xe fasile essare butà nel sesto dele scoasse sé se xe ‘vanti co’ i ani e malandà. Da veci se xe solo un peso che vien lesierìo co’ quatro  schei. No se xe capìi, lassà soli, sensa afeti e sensa amore. Bisogna alora, savere deventare veci. Essare cosienti dei propri limiti, sercando de no ronpare le scatole, ripetendo senpre le stese storie, avere dee pretese e essere rabiosi. So convinto, che solo se no faremo ste robe a podaremo vivare co’ dignità.

LA VECESSA  VA VISSUA, no ghemo da vargognarse de essare veci. A ghemo da volerse ben par tuto el tenpo ch’EL PARON ne lassa ‘ncora qua. A ghemo da pensare a quelo che ghemo fato, a quelo che femo e a quelo che faremo par meritarse el nostro POSTO che LU’ el ne ga preparà. Alora  sì, che essare veci sarà un reposso che ne permete de vardarse dentro col core seren e libaro dai bruti pensieri che ne vien fora ogni dì.

Bona jornata!

E BEATITUDINI DEL VECIO

Beato el vecio che sa scoltare

Beato el vecio che sa stare insieme ai altri

Beato el vecio ch’el sa scoltarse

Beato el vecio che dise grassie

Beato el vecio che prega par lù e par nù

Beato el vecio che iuta chi che ga bisogno

Beato el vecio che xe umile

Beato el vecio che no xe orgoioso

Beato el vecio che no ronpe le scatole

Beato el vecio che sa contare le storie ch’el ga vissù

Beato el vecio che se fida

Beato el vecio che se confida

Beato el vecio che varda ‘vanti

Beato el vecio che se move e n’ol sta in poltrona

Beato el vecio ch’el sa  de essare deventà vecio.