Sabato 29 giugno 2018  

Carissima S. e blog.

                                 mi sembra di avere già detto che una volta mi davano fastidio i vecchi, perché dicevano sempre na volta....te ricordito...Ora è arrivato anche il mio momento,...la ruota gira  e mi ricordo che andavo alla sagra de San Piero co me popà, sentà sul baston de a bicicleta, co e strade bianche a rivavimo tuti inpolvarà...Passavimo pal paese pien de bancaree e calche giostra,. In piassa gera  pronti el pao de a cucagna e  el fio de e pignate ....Me popà non se fermava, parché n'ol vedéa ora de rivare a casa dei so cugin Ferucio, ch'el stava in meso a canpagna. Prima de rivare sentivo za da ontan, l'odore del poastro e  de é fugasse ...me vegnéa na fame....de pì ncora de quea che gaveva. Quando rivavimo tuti se alsava da toa e sigava: xe qua Orelio e zo pache so e spae...min invesse me butava su a toa a magnare e no me stacava fin che no me inpeniva a pansa...Dopo ndava co me cugini nei canpi a rompegarme su i albari  e magnare i pereti de Sanpiero...cossì passava a giornata e a sera se tornava casa co me popà che pedaava straco...Mi a note me scomissiva un mal de pansa che no ve digo....W San Piero e Paolo e AUGURI ...AUGURI a tuti quei che porta sti nomi.

Bona giornata!

Che voia che me faséa e giostre

che vedéa passando

pa a piassa de san Piero

in te sto dì de sagra del paese,

ma e vedéa e basta,

parché me popà 

schei  n'ol gavéa e vegnevino 

a  Sanpiero soo par fare festa

dai cugini  e par magnare e béare.

Mi me contentava de magnare

ede inpenirme a pansa co i pereti...

Altro che giostre e foressi...

questa gera a vita  de na volta

par nialtri poareti,

ma sti giorni i gera benedeti,

parché finalmente magnavo

fin che crepavo.