Carissimi,
stamatina me also, meso incocuiio vago in cusina pal cafè, verso el balcon e vedo che xé ncora scureto, voevo ndare in leto, ma me so messo a scrivarve. Me sona el telefono par visarme che go on sms, o vardo e xé me nevoda Rossana che augura bon zoba grasso a tuti, mi, e go visto che anca Alessandra a se ghemo desmentegà. Sta roba a me inchieta, parché vol dire che sò proprio vecio. Alora, a torno indrìo nel tenpo e me ricordo che no vedéo l'ora che vegnesse carnevale par ndare a balare al Cavalin co la sala tuta piena de balonsini de carta colorà i tavolini preparà e l'orchestra che sonava bughi bughi e roch and roll, tanghi, valser e charleston, ma mi no ndava solo par balare, ma par smorosare. Nel '68, co i me amissi Massimo e Roberto, semo ndà a balare al Cristalo de Este e go conossuo Maria....No continuo a scivarve parché me vien su a malinconia.
Bona iornata!
Carnevale
ogni scherso vale,
e xé vero, parché
in cà el me ghe fato
on bruto scherso,
el me ga fato ricordare
a voia de balare,
e tante persone care.
A musica, e sale da ballo
e le tose che spetavo
fora quando che le ndava torse
a bicecleta al stallo,
par conpagnarle a casa,
sercando de darghe
calche baseto e tornare
co la contentessa davanti a i oci
e la tosa in soasa.
Nessun commento:
Posta un commento