Carissimi,
dopo do mesi me so alsà bonora e so partìo pa a me passejata so l'arzare del canae verso Marendoe, in mezo on nebio che no ve digo, a sessanta, setanta metri no vedéa gnente, me paréa de caminare sol bonbaso. Jera ciàro, sentivo el bordèo del treno, ma no o vedéa. Verso i canoi i albari i xé tuti sechi, ma vissanandome go visto che i scomissia a varesare e questo xé on bel sperare, che a primavera xé drìo rivare. Camino...camino, no vedo anema viva, dopo poco sento de e scarpete che bate so l'alsfalto e me sorpassa on tosato, me sposto e toco l'erba de a sgrota del'arzare e squasi brisso so a brosema, che ga incoorìo l'erba de argento, sento, ma no e vedo e gainee de aqua, a ma a pena vedo calche oseeto che zoa. Anca e canpane e me riva smorsà ae rece. Fasso fadiga a caminare, me supio de continuo el naso, el zenocio sinistro me fa mae, ma go fato el me jereto e so contento.
Bona jornada!
Ben inbacucà
a caminare sò 'ndà.
Par l'arzare no
vedea gnente
da a nebia che ghe jera,
a brosema cuersea a tera,
el soe el me paréa
on baon bianco,
come serti lanpadari,
piantà in meso al ceo,
l'aqua del canae
a xé verde e me so domandà,
parché no a xé cossì d'istà,
che invesse a xé senpre
bruta, scura e maron,
a penso che a sia cossì par
tuta a porcaria che l'omo
el ghe butà drento,
a xé finìo el tenpo
che nel canae a noavimo
e se ava e arte,
desso da sta aqua
bisogna che ghe stemo in parte.
Nessun commento:
Posta un commento