Carissimi,
come che vedì continuo a scrivare in dialeto par far 'ndare vanti el projeto de Erica. Domando scusa a queli che no lo capisse, ma se me scrivì 'na Mail: naibbaf@libero.it, a ve lo traduso. Stamatina so 'ndà a caminare, solito jro so l'arzare del canale verso Marendole, dove che se camina ben senza nessun trafico. Jera squasi le oto e ghe jera ncora nebia, bassa e fissa che no se vedéa a trenta metri, a sentìa solo i cani sbaiare, el bordeo dei treni sferaliare so le rotaie e calche cornacia col so graciare. De sora de a nebia ghe jera on bel ceo celeste e anca on bel soe splendente che, nel me ritornare, pian pianeo el ga sparpaià a nebia, ghe jera solo calche fumarela verso la riva del canale. Tornando me se ga vissina sbaiando on cagnoto, no go ciapà paura, ma gavéo on poca de fifa, parché el so paron el jera distante e anca se lo ciamava, le cagnoto no lo scoltava. Cari amanti dei cani, e sì in tanti, ste tenti, parché e xé senpre bestie, fevene conto pensèghe, parché al d' de on cò no scolta gnanca i cristiani, ma no ste pensare che i animali i sia difarenti, prové a trascurarli na scianta e vedarì davero e bestie. Mi i animai i rispeto, i vardo voentiera, ma i asso vivare come che a xé a so Natura. Valtri che ve piase i animali, no ste volermene, mi a penso cossì e se posso iuto tanbto volentiera e persone.
Bona jornada!
Che belo che xé
'ndare a caminare
dove che no passa
moto e machine.
Che belo
sentire el fredo,
vedare a nebia che sparisse
soto a luse splendente del sole.
Che belo che xé
vedare spontare e prime foie
so i albari e prime margherite
e scoltare i oseleti cantare.
Che belo che xé
sentirse vivi,
suare e caminare.
Nessun commento:
Posta un commento