Carissimi,
ve conto quelo che fasso i te sta bela domenega de festa, che se presenta bastansa ben col celo sereno macià da calche strissa de biso, ma tanto ciaro intorno. A so qua che serco de ricordarme quelo che go sognà stanote, ma no ghe xé verso che me ricorda. Stamatina vago, come tute e domeneghe, a rispondare Messa in Casa de riposo e pregarò par on amigo che xé morto qua e pal nostro capelan che da venti dì el xé ricoverà in ospedale. On cò vien me nevodi a pranso e anca na nostra amiga, la Gema la ga fato on polastreo in tocio co le patate da lecarse i bafi. Dopodisnà, se i ospiti va via presto, 'ndarò a fare na passejata, ma so sicuro che gavarò calche altra roba da fare, parché come go senpre dito - a sò un omo senza tenpo - parché i xé i altri che me lo fa passare domandome questo e queloa e mi no sò bon a dirghe de no. A ste robe me so ormai abituà da quando in pension so 'ndà. A tuti valttri ve auguro de passare come che voì 'na
BONA DOMENEGA!
Alba ciara e scura,
la fa el so verso
la Natura.
No ghe xé gnente e nessun
che pole canbiarla,
gnanca el sior,
ch'el crede de essare
paron del mondo,
invesse quando che ghe toca
anca lù tuto qua lassa.
Solo la Natura
a xé cossì par tuti,
pa i siori, i poareti,
i beli e i bruti.
Nessun commento:
Posta un commento