marti 21 febrarop2017

Carissimi,

                 a ve conto l'ultima che me capita, stago a Mosseese, ma go la residensa a Triban, dove che go a me caseta. Quaa a vegno  a tore a posta, fare e puissiee passare calche ora co i me ricordi, come ieri e on co, ma vago a magnare da a me conpagna Gema e se  femo conpagnia anca a note, tuto al ciaro del sole. Dunque, ieri vegno qua a Triban e drento a casseta de a posta a go trovà on aviso che go na racomandata ferma in ofiicio, alora vago in posta, fasso a coa e ritiro a racomandata che me ga mandà el Comune de Triban ( el ga speso € 5,95 de bolo), la verso e leso che sicome no stago senpre a Triban i me vole scancelare dal'anagrafe, Ghe digo e i me o fa scrivare che i me intaressi i xé a Mosseese , par  questo go on domicilio in te sta cità. I me ga anca dito che i vigili, (che i xé queli de Mosseese), i xé passà diverse volte da casa mia, ma no i ga mai trovà nessun. Mi credéa de essare libaro de fare quelo che voio, de ndare dove che voi, ma invesse no a xé cossì. No ve pare che la sia na barzeleta, ma in te che mondo vivemo. I me ga dito che ghe xé de le regole da rispetare, ma lori no rispeta, quela che on co i ciama privacy, e se i xé vegnù e no i me ga trovà i podeva metarme on aviso come che ga fato el postin par dirmi che go na racomandata ferma in posta. Mah! Desso stago vedare come che a va finire, me tocarà deventare apolide.
Bona jornada!
 

 

Nebia,

fredo,

scuro,

on inverno duro,

pien de rafredori

e influense,

zontà da rogne de  burocrassia,

che no so come che la sia,

che vegna controlà

da la munissipal polissia.

On comune invesse de tegnere

da conto chi poco o tanto

tien ben a so caseta e

poco o tanto i fa spesa

ne le boteghe del paese,

i vole  butarlo fora,

par sercare de torghe

da le scarsele on poche

 e prde palanche

e torghe la libertà

de fare quelo ch'el vole.

Co sti fati

i me pare proprio mati

e no so quali che

i sia i risultati.