Carissimi,
ve domando scusa par quelo che go scrito ieri, ma iera cossì inebetio che me so sfogà co valtri, scusemme ncora. Xé vero ch'el tenpo ne iuta, parché da ieri e on co a me so calmà na scianta. Stamatina me so alsà, volevo ndare a caminare, ma jero ncora indormessà, però me so alsà e a caminare so ndà. Caminando, anca se ghe iera el celo biso, go snasà aria de primavera, go visto tra l'erba fresca i oceti de la Madona e tanti oseleti che zoava, alora ne xé vegnù in mente on dito:'D'inverno, co' vedi tanti osèi zoare, vol dire che la primavera xé drìo rivare', co sto pensiero go fato a me bea passeiata e desso so qua sentà a contarvea.
Bona iornata!
Tra e foie secà dal'inverno,
xé spontà i oceti de la Madona.
Sti beli fioreti
sconti in meso l'erbeta
picenini,col so vestitin celeste
i fa tanta teneressa,
i xé el primo regalo
che fa la Natura
e l'inverno
no fa pì paura.
Note: ricordeve de lesare sensa la L.
Nessun commento:
Posta un commento