On cò el ventesèo el fa el fa i so versi, anca mi go on colpo de mato e
me xé vegnù voja de scrivarve in diaeto.
Bona jornata a tuti!
Sora al torion che xé on nuvoon
cossì scuro, che el me diséa
de n'on dare a passejare.
Go messo fora a testa dal balcon
e on colpo de vento me ga fato
fare on straunon.
Ah! Go dito: xé finìa l'istà!
Me meto e braghete curte,
e scarpete e do majete, e parto.
So l'arzare go sentìo so e rece
el bordèo del venteséo,
me sò fracà in testa el capeo, e via.
Su nel ceo e nuvoe coréa
spente dal fresco ventesèo.
L'aqua del canae a jera
increspà come e onde del mare.
I osèi nel ceo i se godéa a zoare.
E gobe dei coi euganei e se vedèa ben,
i me paréa dee vache colgà.
Nei canpi a spagna xé
cressù n'altra volta.
L'erba so e sgrote a xé alta
e i so ciufi i sventoa come bandiere.
Soto el ponte de a ferovia
incontro a Maria che a me dize
de stare tento che xé on can malcontento.
sento el can sbajare, me fermo.
Rocki! Sento ciàmare, el xé Angeo
che ciama el so can e me so rincuorà
e caminare go continuà.
Nessun commento:
Posta un commento