Carissima S, e blog, stanote a me go sognà del cinema Roma e de on paro de robe che xé capità che ncora on cò a me vien da ridare. El cinema in prinsipio el se ciamava Cinema Sociae e dopo el xé sta ciamà Roma. El gavéa e so careghe de egno, i posti divisi in primi e secondi posti, e col pavimento de egno che dopo ogni proiesion, el jera senpre pien de carte de caramee, de ciche e de scorse de bagigj. Mi a vedevo i film gratis, parchè vendevo caramee in saa e cossì a conossevo tuto e tuti. Sergeto rivava in cabina a e do de dopdisnà par far su a peicoa, ae quatro rivava 'Vecia' (Montin) a controoare che a saa sia neta e che tuto fusse a posto, verso e sinque rivava a cassiera e a se metea drento al boteghin, a meteva a posto i bilieti in primi posti, secondi e ridoti par miitari e ragassi. Intanto vegnéa sera e rivavo mì, saudavo tuti e ndavo nel sgabussin, me metevo a casseta al coo e n'davo da a Jole, a cassiera, par farme dare e caramee da vendare durante intervaoo. Pian pianèo i secondi posti del cinema i se inpeniva e i primi no jera mai quasi mai pieni, a ora calchedun riussiva a saltare nei primi posti, ma Vecia i tendeva e i faséa tornare indrìo e i dovéa stare in piè. A me ricordo che 'na sera, e no go mai savesto chi che xé sta, uno ga fato el furbo e ga roto na fiaeta 'spussoente' che in on bater d'ocio a ga libarà na fia de posti col ridare de tuta a saa e el corare spasemà de Montin che n'ol savéa cossa che jera capità. Dopo i spetatori se chietava, a uce se stuava e scomissiava a proiesion co a setimana Incom, na sera in saa jera tuto siensio i fasèa vedare on cinema co Ava Grdner e Alan Lad, tuti jera 'tenti, incantà, quando se verse pian pianeo a tenda de veudo e Vecia co a torcia in man el conpagna on spetatore a sentarse nei primi posti, Marieto, ch'el jera on bon tenpon, el jera sentà vessin e prima che questo se sentasse el ghe ga messo soto el cuo na baa de goma e quando questo se ga sentà a ga fato na scoresa che ga fato rinbonbare tuta a saa, tuti se ga messo a ridare a crepapee e xé vegnù fora on pandemonio che Sergeto xé sta costreto a fermare el film.
Bona Jornata!
Ieri, ca jerimo zovani,
no gavevimo paura de gnente,
on cò, che semo veceti,
basta on colpo de tosse
e 'ndemo ramengo.
Cossì a me vien in mente
tante robe vece e scomissio a contarle
par no desmentagarle.
W a joventù
che par quante robe che se inventemo
questa no a torna più.
Par questo e scrivo,
parché a joventù
a sia e e astaga on ricordo
senpre vivo.
Nessun commento:
Posta un commento