Ciao Sandra, mi sono emozionato nel leggere la bella poesia e vorrei volare lassù, libero di amare. Ciao e buona giornata. Giancarlo

 STORIA E STORIE

El Moraro la xe‘na via fata a ridosso del’arzare del canale “bisato”, ch’el se ciama cossì par le curve, che man a man  el fa, vegnendo zò da Vicensa. La via la se trova fora le mura de la cità e  prima de la guera, par ‘ndare in piassa, che jera un ponte, ciamà : “ el ponte de la pescaria” ,  ‘na passarela de legno, che la traversava el canale tra Cenini e la vila Bussacarini e un ponte de fero elevatojo, par fare passare le barche che le cargava la trachite de la cava de la Roca, questo el se trova  davanti a vila Pisani, a la crosara  tra la riviera Belzoni, l’arzare del canale e la strada che la porta in stassion dei treni. Par ‘sto motivo, su la copertina de ‘sto libro, go vossudo metare ‘sta fotografia, che la mostra el trato de canale, dal ponte de fero al ponte de la pescaria; dato che ghe sò, profito par ringrassiare el me amigo Doriano, ch’el xe l’artista de l’inpaginassion e de le imagini che trovarì  dentro a ‘sto conponimento. 

Mosselese la xe nata tanti secoli fa, ‘na volta el Monterico e la Roca jera tacà, ma nei secoli, co’ la costrussion del canale da parte dei venessiani, questi i se ga fato anca le vile e qua i siori de’ Venessia, co’ le barche i partiva dalà e li vegneva qua  a fare i so afari. Anca i mosselesani  pian pianeo i se ga fato le case, una tacà l’altra par risparmiare tera e muri, e cossì xe nate dele vie intiere. Qualche via la xe restà come ‘na volta, ghe xe qualche restauro, ma la fisionomia dele vie no la xe canbià, se no che xe sparie tante boteghe de artigiani e de comercianti. Mestieri che pian pianeo i xe sparii, quando che xe vegnù fora le fabriche, che la fa la roba in serie co’ machine industriali;   cossi’ gà sarà botega i sartori, i botari, i scarpari, i favari, i selari, le ricamatrici, i falegnami, come artjani; le boteghe de casoin le se ga trasformà in supermercati e le vende verdura, fruti, dolsi, carne,  quaderni e roba da vestire, le vecie ostarie le se ga trasformà in bar , paninoteche, birerie. Dove che jera tante picole boteghete de ogni genere de roba, ‘desso ghe xe  ufici e banche, anca i sensai i se ga trasformà e i ga verto agensie imobiliari e centri servisio.

‘Na volta, a la matina, quando faseva ciaro el canpanaro verseva la porta de la cesa, l’oste verseva l’ostaria, el casoin, el becero i verseva la so botega, el fornaro gaveva el pan pronto e tuti i artijani li scomissiava i so mestieri.  In giro se sentiva profumo de pan, de vin, de carne, de cola, de vernise, de patina, de cleorina dei cessi publici, che se confondeva co’ quelo de caramele, de marmellata e de mandolato de la fabbrica de Dal Din ,  de Navara e de la Saiace.  Un cò se sente solo odore de gas de le machine, dei alevamenti de piti e del fumo de la cementerai. Alora l’orario jera quelo del sole, un co’ tuti gal so orario  e solo  l’edicola  la  verse bonora.