Zoba 13 setenbre 2018 

Carissima S. e blog.

                                  ieri dopodisnà so nda dal dotore, el me ga vardà in boca, el ga visto un bruto asesso, el me ga ordinà antibiotici, speremo ben, parché a fasso fadiga magnare e mandare zo. Quando che se sta poco ben, no se ga voia de gente.... so qua che scrivo par passarméa via, ma no go voia de fare tutte e robe che gavaria in mente, ansi go paura che se a continua cossì, no podarò gnanca ndare ai funerai dei amissi e a vendemare....Comunque so ncora qua.... in casa e serco de passare a giornata tra leto, lezare e scrivare. So drìo fenire de lezare L'ARMINUTA che voé dire LA RITORNATA, el xe un libro che parla dea xente poareta de tanti ani fa, piena de fioi che no i saveva cossa darghe da magnare, parché lavoro ghe ne gera pocoe schei oncora manco, cossì ghe gera l'abitudine de dare i propri fioi a xente sensa fioi, che qua da nialtri i vegnéa ciamà :"Fioi de anema". Nel romanso, sta fameia de sinque fioi, i ga da a dei lontani parenti na putina , ma a diese ani a xe sta da de ritorno a éa so fameia originae e nel diaeto de a region Abrusso i a ga nominà l'ARMINUTA cioè LA RITORNATA. El xe un bel libro che me ga piasso, parché a me ricorda a me vita da picoo, anca mi iera sta domandà da dei signori che stava ben de casa e de tacuin, éa a se ciamava Iole e so marìo Ilio, ma me popà e me mama i gera poareti, ma orgoiosi e dignitosi, cossì no so mai nda  da nessuno come " Fioo de anema".

Ah! 

i nostri coi che bei che i xe, 

da ogni parte che te vè

te vivi na giornata da re,

te vè drento a tanta beessa, 

te  snasi i so odori

te vedi i so coori,

soto e piante ne é ostarie

te gusti na fetèa de saame

e un goto de vin bon,

che se no te ste tento

a bevarghene tanto

te risci de fare on rabalton.

Sui coi xe beo vegnere 

e ndare de qua e de à de zinzoon

 in ogni stagion.