Mercore 5 setenbre 2018   

Carissima S. e blog.

                                  no capisso parché ogni volta che go da ndare drento a sto bussooto a go da metare a posto l'orooio co data e ora....penso che sia proprio drìo ndare a farse frisare. Comunque par desso a ghe a fasso e ve conto a bea passeiata in bicicreta che go fato ieri dopodisnà. A s'ò ndà su par l'arzare, a Marendoe me so fermà a bevare el cafè da  amissi e dopo go continua pian pianeo. Me so gustà el ceo beo, a canpagna, e piante oncora piene de foie verdi insieme a erba alta, che in te sti dì de piova a xe cressù. So rivà a Cà Barbaro, me so fermà a vardare el lagheto coorà de azuro e a éa Ceseta de-e Ave go dito na preghiera par tuti e par tute e disgrassie che ghe xe in giro pal mondo, no sò s'el  PARON me scoltarà, ma sò sicuro ch'El scolta ....Go continua e invesse de girare par Marendoe e tornare, a sò ndà sù drito fin al lagheto de Manfrinato, anca questo de un coore azuro co dei toni de verde....be..beo...beo...Ndando zo e sù pa-e casete de Baon go incontrà un amigo ciclista e se ghemo fermà a fare quatro ciacoe, el me ga contà che poco prima el ga visto na volpe e de boto el cascava come a setimana passà, cossì el me ga mostra a gnoca ch'el gaveva oncora sul zenocio. Dopo se ghemo saudà parchè el xe ndà sù pal monte Cecilia, invesse mi so ndà zo pa-e vae; go girà par via del Vescovo, ma so tornà indrìo parché a gera na stradea sarà; pì vanti go girà par da teta, so ndà vanti un toco, ma me sò girà par ndare verso el lagheto de-e rose e me sò sentìo ciamare da Ciano, ch'el gera sentà soto un albaro col so cagneto, che col me ga visto el se ga messo sbaiare....ma sò ndà verso Ciano o stesso, parché i dise che "can che sbaia non taca". Ciano o go trovà ben dal'ultima che o go visto in ospedae, el me ga fato vedare na carta dove che i o manda a farse un esame a Negrar, el paese che in te sti dì el xe sta vioentà dal'aqua. Dopo un poco xe rivà a Katiussia, a fioia de naltro amigo che sto ano ghe xe morta a moiere, parlando co éa  a gò sentìa interessà al me Voontariato al'AVO, cossì ghe go dito che sto mese scomissime el 28° Corso per aspiranti Voontari e se ghemo scanbià  i numari de teefono. Cari, a xe sta na bea meza giornata e co tanta sodisfassion so vegnesto casa. Un cò scomissio l'ano col Grupo de Letura e doman ve conto el resto ...

Bona giornata!

Vardè che beo che xe

navegare sul Bisato,

che mi go visto

fin da quando che sò nato,

parché a stavo in via Moraro

che o rasentava.

Drento  na volta

a se noava,

  me mama e arte lavava

e co me popà pescava.

On co  no stago pì in via Moraro,

el fiume el xe un loamaro,

se te caschi in aqua

te mori stechio, sporco e veenà

come ch'el xe

no te poi gnanca metere 

drento un piè.

I tosi de a remiera

i serca de farlo rivivare,

ma se n'ol vien sgarbà

da e-é erbe  e netà,

fra poco gnanca ori

no i o navegarà.