Luni 10 setenbre 2018  

Carissima S. e blog.

                                  ieri a go fato tonboa, na giornata piena, pedaando a bicicleta so nda in piassa a vedare el mercatin medioevae messo su da e Contrade. Go visto dei bei abiti e de-e bee bancaree, in piassa, su pal Santuario e drento al Casteo, un spetacco davero beo. Dopo avere girà so ripartìo par ndare verso Bataia dove go leto, da calche parte, che ghe gera a mostra de-e novità su e biciclete, me interessava que-e eletriche a pedaata assistia. So ndà pa a canaeta fin al passaio a liveo dei Montesei, o go traversà e so ndà drento al bel viae de Lispida  e col profumo de a uà a go girà intorno al Casteo e so ndà fora su a strada dei alberghi, dove l'ano passà i ga fato sta manifestassion, ma drento no ghe gera niente e  ghe go domandà a calchedun dove che a xe a fiera....i me ga risposto a Garzegnan, aeora go vardà l'orooio e gera tardi, parché dovevo ndare in Casona a Pernumia, dove i me spetava par pransare, cossì me so ferma nel boscheto de Bataia e go bevù un bel goto de aqua, go leto el giornae e dopo so ndà verso Parnumia pa eà strada dell'arzare de drio a ex Galileo. A so rivà a mezodi sonà, a toa gera preparà e intorno ghe gera Vitorio, Teresa, Giovana e a Gema, de sora a spigantare ghe gera a Luisa e Olindo gera drio catare e ultime tegoine sul so orto. So ndà a saudarlo e a vedare e suche bee grande e zae. Dopo na mezoreta e done ne ga ciamà che gera pronto; ghemo magnà  rigatoni co fasoi e ragù, el vedeo tonà, tegoine, formaio e par finire a torta schaker che Olindo gera ndà tore da Da La Bona, naturalmente co vin nero e rosateo che ne ga dà a bota par mandarne in ceo, co a zonta de cafè, graspa, prugna, limonceo e tante ciacoe co Vitorio che tegnéa banco come el so soito. Me gera vegnù na paca de sono, ma no gero soo parché anca st'altri i gera incrucoiì. Verso e quatro so montà in bici e so ndà a San Bortoo a vedare a tapa del Giro de Spagna ( a Vuelta). Gema me ga teefonà preocupà, parché a se gheva desmentegà che ghe go dito che ndavo a vedare a Tv a San Bortoo. Go visto na bea tapa, pecà che no ghe gera gnanca un Italian tra i primi. A sera no go senà e verso e oto a so ndà  al Boscheto a scoltare Caciari ch'el xe rivà ae nove passà. O go scoltà voentieri parché el ne ga contà de-e robe interessanti su a poitica europea e disendone che xe ora de sveiarse, se voeemo davero essare na nasion europea. Al boscheto gera frescheto e co ga scomissià a parlare Betin a so tornà casa. Come che ve go dito na giornata piena , ma che a me ga assà mae e ganbe e mae a goa. Speremo che me passa presto....Avanti senpre!

Bona giornata!

No so vegnù fora ben,

ma so mi in relass

come che me piase.

Sto ano, che xè ncora da finere,

a  ghe no fate e conbinà

de tuti i coori :

Go deciso de no ndare

pì in Casa de Riposo;

all'A.V.O ghemo fato 

el novo diretivo;

a  me pression fa a mata;

e vacanse al mare a Viserbela;

a festa del me conpleano

co tuta a fameia vecia e nova;

i fanghi a-e Terme de Abano;

i bei viaì a San Vito, Loreto,

Recanati e Montepaolo

e a setimana a Sotomarina.

Nei prossimi dì so drìo

preparare el Recital Convivio

co i Poeti de a Roca in Fiore;

go scomissià el novo ano

col Grupo de letura.....

AVANTI! AVANTI SEMPRE!

Quante robe che me capitarà

un co, doman e fin a fine de ano

no se sà, ma ringrassio 

EL PARON

ch'El me assa ncora qua.