Venare 14 setenbre 2018  

Carissima S. e blog.

                                 stamatina co goverto sto bussooto su POET...AMO, go trovà a bea sorpresa che me ga fato S. che in Italian se dise MENTORE (me pare). S me ga fato i complimenti, parché gnanca da maà no me fermo a scrivere el me RIME...DIARIO. Sì, cara S. oramai a go fato abitudine e se no scrivo tuti i dì, me pare che me manca calcossa in testa.  In te stì dì che so in casa me manca anca e me passegiate, ieri go provà a fare quatro passi, ma so rivà fin in cesa dai frati e pò so tornà straco, spero che me passa presto sto malstare e de riussire a magnare. Me pare de ndare un poco meio, ma me fa oncora mae a mandare zo. Se a va oncora cossì, doman no vago gnanca a vendemare, me dispiase, parché a gera na roba che ogni ano no vedo ora che vegna sto dì, me dispiase anca parché i me amissi i me toe in giro  e no posso gnanca stare in conpagnia a magnare a pastassuta de fasòi che fa a Gema , ma spero che a me ne tegna un piatèo e se me a sento, doman de mezodì a vago a Parnumia, in Casona, a magnarlo, cossì a sento quanto che i me siga drìo. Cara S., come che vedi a scrivo in diaeto, parché me pare de parlare co i me veci e co tute e persone care che oramai da tenpo e me ga assà. Me vien sti pensieri, vardando e foie meze zae che scomissia cascare e che  me dise che xe drìo rivare el mese de RICORDARE..... che prima o dopo anca mi ndarò a trovare.

Bona giornata!

Eccoi qua fotografà

tanti de quei che i ne ga assà.

Tuti vestiì in gringoa,

in posa par fare a fotografia

de fameia da tegnere par ricordo.

Un cò a xe difissie trovarse

tuti insieme e co cossì tanti tosi.

Un co i tosi e tose 

i posa par altre fotografie

che i se scanbia co tuti che i ciavesèi

che i ghe fa vedare tuto

queo che i voe e no i ga gnanca 

tenpo de vardarse, parlarse

e gustare el magnare, 

parché i xe senpre drìo pincionare

su sti cosi e i me ga tacà anca a mi

sto vissio, ch'el 

 n'ol xe pì un sfissio,

ma el pare deventà 

na vera e propria necessità.

Dessò i ghe na inventà uno

che el te avisa quando che 

te ste mae, e prima 

de cascare par tera el ciama aiuto.

Però drento ste robe

insieme al beo ghe xe anca el bruto 

e bisogna stare tenti ai putei

che anca ori no xe pì quei,

che vedéìmo in te sta fotografia,

parché da sti cosi i xe portà via.