Sabo 8 setenbre 2018 

Carissima S. e blog.

                                  dopo a sgiachetà de piova ch go ciapà ieri dopodisnà, a é-à sera che gera un bel rosso che sprofondava drìo i coi. Pì tardi co Giorgio e so miere semo ndà a magnare a pissa da Giona a é-à Costa co tutti i Vooantari del'A.V.O. par festegiare a Paola che xe deventà Presidente  e Denis che ghe ga assà el posto, xe sta na bea serata passà in conpagnia. Stamatina vago al funerae de Marek, a tacare i manifesti pal 28° Corso de Formassion par Voontari A.V.O. Ae quatro de dopodisnà, co a Gema, a teresa a vago a Messa a é-à Madona de Terrassa, parché un co xe a festa par che a tosa che pì de domia ani fa a xe sta selta par deventare a Mama del Paron che se ga fato Omo par vegnere portarne nea strada giusta che a gavevimi persa, ma caro Paron bisognaria che te vegnessi anca un co, parché a semo drìo ndare a rodoi. L'Africa xe drìo scopiare, tanti africani i voé scanpare e a costo de morire pa a strada i ciapa é-e barche, par traversare el mare col riscio de negare. Co i xe qua no i sa ndove dare e tanti i casca in man a é-a maavita e i deventa deinquenti. Par no parlare de che- è guere che vien fate nea tera dove che Te si nato e à vessin, pò passando el Mar Rosso ghe xe tante guere nel Nord del'Africa, parché a Cina, a Merica e l'Europa a continua a fabricare arme e ghe è dà ai governi africani in canbio de petrolio, gas e roba presioza. Tino i te conosse pì, parché i conosse soo i schei....Te prego fa calcossa e Te o domando con l'aiuto de to Mama Benedeta.

Bona giornata!

A note desso a xe pì onga

e giornate pì curte,

l'istà xe finìa

e ghemo finìo de ndare via.

Sta setimana che vien

scomissia e scoe,

matina e sera machine

che intasa e strade

e ghe xe tante coe,

parché a xente porta i putei 

a scoa, in pissina, a ginastica,

Tuto questo xe  fruto del progresso,

a vita grama de na volta a  xe finìa,

e se ne incorvimo dé-é stagion

che canbiava

parché tuti a piè a scoa se ndava,

a ginastica a fasevimo corendo 

e a pissina el gera el canae Bisato

dove se noava.

Venare 7 setenbre 2018

Cariussima S. e blog.

                                ieri sera a me so trovà coi amissi Teresa, vitorio, giovana, olindo, luisa e naturalmente a Gema, a magnare a prima pissa dopo e vacanse. No ve conto queo che xe vegnù fora. Vitorio el pareva scaenà, par contarne de queo ch'el somenà col xe vegnù casa; a Teresa a ne ga contà che a xe ndà fare a visita par l'invaidità e ch'el dotore vardando e carte non la ga gnanca visità e la ga fata inabie al 100%, pora tosa a sdo maaàtia a xe davero bruta, ma éa a ga na grinta che no ve digo, pensé che ha ga fato a fugassa de ua, quea de Olindo, che quando ch'el xe rivà el ne ga dito che ndemo avendere sta setimana che vien, a é-ora a Luisa ga ditoi che domenega se trovemo in " Casona" par fare na magnadina; dopo a ne ga dito che Stelio xe sta operà a Padova a core verto e i ga messo a valvoa niva e do canèe che e xe ciamà bay pass. A seratandare  a xe passà co Vitorio che ga sberegà ramenando e man e dandoghe de pache su e spae a Olindo. Stanote go sentìo a pissa rumegare e anca el tenporae. Stamatina a me so sveià co l'ucheo de-a tortora, che dopo naltra sguassadina de aqua a se ga calmà; Gema voe ndare al marcà, anca se no so se i anbuanti i versarà e banchi, ma mi a conpagno, prina de nadare da dentista, parché a go el soito dente che ogni tanto el me da fastidio e xe meio che o tegnemo controoà anca sìel xe sta devitaisà. Pì tardi vien Sandro ch'el me ga da portare el PC che me ga giustà e stasera a go a prima riunion del'AVO col novo Presidente, ansi a nova Presidentessa che xe a Paola, na voontaria de a prima ora, che a se ga tolto sta nosa, dopo che Denis el ga dito che el vorìa stare un poco de pì co a so fameia, dato ch'el so lavoro o porta via tuta a setimana. Desso ve asso parché el tenpo tanbara oncora e tiro fora amchina par conpagnare a Gema al marcà.

Bona giornata!

Calche ano fa go scrito

el pensierin

" Adio braghe curte"

e anca sto ano a o ripeto

e quée onghe me meto.

L'istà xe finìa

co a festa par a

nassita de Maria,

che doman vien ricordà

in tante cese, come quea

de Terassa, dove ndemo

doman a scoltare a Messa,

par dirghe che a ringrassia

so Fiòo pa e tante bee robe

ch'El ne ga dà fin desso

e che a ghe domanda

de perdonarne pa e maerobe

che ghemo fate.

zoba 6 setenbre 2018 

Carissima S. e blog.

                               a una donna che ha donato la sua vita intera ai malati e ai poveri.

Madre Teresa di Calcutta. Co st o pensiero che go scrito ieri dopo a Messa al'Ospedae Nadre Teresa de Calcuta, parché ieri gera el ricordo de éa SANTA. Se passè par caso, no par mae, dal'ospedae, in fondo posà a parete blu, ghe xé na mostra de panei che i conta a vita de sta granda DONA. Ieri go savudo che xe morta Sr. Giana, na bona suora amiga de tuti,  magra inpisà, ma che ndava in giro par Mosseese e saudava tuti. Quando che a incontravo dopoa averme saudà e me ricordava a Maria che a gera so amiga. Naltra notissia go ricevù ....a xe morto Marek, par tanti ani custode del Casteo de Mosseese, na persona seria, preparà, inteigente e serioso, ma co n'aria da tore in giro,  el me gera sinpatico, specialmente nei ultimi ani pien de mae, ma anca pien de grinta par tore in giro a morte col so baston. A ste do bee persone e ae so fameie che fasso e condolianse e ghe so vessin. Dopo ste notissie cossì....cossì, ieri sera so ndà  in piassa a vedare partire, dopo e vacanse, i tosi de 4 PASSI, i gera un sentenaro, co e so maiete coore naransa e pieni de voia de stare insieme a contarsea.....

Bona giornata!

A giornata xe finia

in beessa

insieme ai tosi dei 4 passi,

tuti pronti in piassa,

par scomissiàre

a caminare .

I pareva tuti gemei

co e maiete

coore de-e naranse

e co tanta voia

de contarse e so bee vacanse.

Quando che i xe partiì

a so torna casa par na cità deserta

co i soiti muci de tosi nei bar

sentà

col bicere in man,

che no so come che i fassa a capirse

co a musica a tuto voume

e e maedission dei veci

che ndava su tute e lune.