Dpmenega 9 setenbre 2018
Carissima S. e blog.
ieri con Gema e Teresa semo ndà a Messa al Santuario de a Madona de Terassa, ghe gera a cesa piena de fedéi e anca fora dea porta, spero che a possa dirghe al PARON tute e robe che nialtri tuti qua in cesa a ghe ghemo domanda, ma so che Lù el ne scoltarà, BON GRANDE ONIPOTENTE E MISERICORDIOSO come ch'El xe. Pì tardi semo ndà a Sciavonia a magnare de-e bone fetucine al ragù de cinghiae, ch'el xe bon sto animae, anca s'el fa un mucio de dani pai canpi. Verso e 9 de sera, so ndà in piassa che ghe gera a Note bianca, tanta xente e tanto spetacoo, go visto dei grandi puatoi iluminà, spentonà da tose che i se inchinava come a saudarne; tante bancaree co bee robete; panchine e careghe dapartuto coi a xente sentà che magnava de tuto, anca el boia né a so ostaria ch'el frizéa patatine, ma a dansa dee baerine, sul palco in piassa, me ga piasso davero tanto. Un cò vago a Bataia a vedare e novità d-e bicicrete in mostra nei alberghi de Garzegnan- Bataia e mezodì in Casona co a conbricoa de amissi.
Bona giornata!
A piassa piena de xente
in te na sera inpissà
da luce de tuti i coori
e in tuti i cantoni,
ma sentà in te i scaini
de San Paolo ghe gera
un omo co a facia scura
e pien de pensieri,
vestìo mae e patìo,
a gera drìo ndare via,
dopo verghe dà
na ultima ocià,
ma me so fermà e ghe
go domandà se posso iutarlo,
el ga alsà i oci inbanboà,
el me ga vardà,
ma n'ol me ga dito gnente
e - el ga sbassà a testa,
so restà fermo davanti a iù
par calche secondo
e dopo so ndà pa e me strada,
e go pensà
che tra tante luce
a ghe ne xe anca calcheduna
de stuà.
Nessun commento:
Posta un commento