Domenega 30 setenbre 2018 

Carissima S. e blog.

                                    un co assemo setenbre de sto ano e spetemo ch'el vegna sto ano che vien. El xe sta un mese pien de robe, ghe xe sta un caldo come queo queo de st'istà;  a Quintana dea Giostra dea Roca xe sta vinta da a contrada de San Bortoo; go conpagna al simitero tanti amissi; xe scomissià e scoe e anca el 28° Corso par Voontari A.V.O.; ieri a me so incontrà co i Poeti dea Roca in Fiore e ghemo passà na bea giornata tra storia, magnare insieme e recita de é nostre poesie sul pensiero Leopardiano., spero che tuti sia sta contenti e che sia torna casa co a voia de continuare a fare parte de sto grupo, ma che anca mi gabia oncora voia de coordinarlo, parché no xe gnente fassie metare insieme tanta xente, ieri gerimo in quindeze co e moiere e amissi, tanti no ga podesto vegnere parché i gera inpegnà in altre robe sue, ma anca parché sto Grupo el xe fato da poeti che vien da distante, ansi non me so ricordà de invitarli tuti, ma se continuemo sta bea roba, a magio spero che ghe ne sia de pì. Un co ghe xe el ceo nuvooso e fa frescheto, ormai xe ora de tirare fora i vestiti pì pesanti e de metare na coértina in leto e speremo che l'inverno n'ol ne porta tanto fredo come el caldo che fge xe sta st'istà.

Bona giornata!

Ne a vita ghe xe

el beo.... el bruto,

el bon ...el cativo,

el ben...el mae,

tuto xe smissià insieme 

e se poe seliere 

queo che sevoe, 

ma a volte, se no squasi senpre

ne capita dosso de é robe 

che no voressimo e 

a éora femoghe bon viso, 

conbatemoe co pasiensa

e serchemo che no e  copa

a voia de vivare.....

Sabo 29 setenbre 2018 

Carissima S. e blog.

                                  ieri sera so nda al primo incontro del Corso A.V.O. e so restà a boca verta nel vedare tanta xente nova, come no gavevo mai vista, davero gera tanti ani che no vedevo na garnde partecipassion , spero che ghe ne resta, afine del Corso, almanco sinque. Na roba me ga assa l'amaro in boca, ghe gera pochi Vooantari efetivi, tanti gaveva mandà e so scuse, ma tanti altri no i xe vegnù e no so se i gabia almanco  teefonà, uno adiritura el xe vegnù par saudarne e xe nda via subito parché el gaveva naltro inpegno....mah! No so cossa pensare, forse i crede de no avere bisogno de scoltare o i dise che e xe e soite robe, ma no i sa che ghe xe senpre da inparare, se no altro par fare vedare ai novi che semo un bel grupo. A serata a xe scomissià co a presentassion del novo Diretivo del'Associassion, a Diression Sanitaria ga mandà i so saudi par via celulare e ga scomissià a nostra Presidente Regionae del'A.V.O., che a me ga fato na bona inpression, pì de altre volte che a go sentìa. Dopo a ga  assa a paroa a un consiliere regionae che ga parlà de come che xe nata l'A.V.O. e ga leto dei pensieri del Fondatore Prof. Erminio Longhini, morto da pochi ani, el ne ga ricordà che in tuta Italia i Voontari fa el stesso servisio e ga el stesso Statuto. Traverso de é proiesion su un schermo, el ne ga fato vedare quao che ga da essare el nostro fare SERVISIO A.V.O., de é dificolta che se trova e del'inpegno continuato, naturalmente gratis. A fine serata a Presidente  Katia insieme col consiliere  Francesco i ne ga dà un sachetin co dentro de é paroe che dovevimo scanbiarse tra nialtri e dopo a ga voesto sentire el parché se ghemo scanbià ste paroe, a xe sta na bea esperiensa sentire a vosse dei presenti e come che i pensa. A serata xe passà in pressa e verso e undese a so torna casa contento pensando che dopo 28 ani de Servisio A.V.O. no go mai finìo de inparare.....

A ghemo tante robe pa a  testa,

a coremo de qua e de à,

el tenpo passa in pressa

e no riussimo a fare

tuto queo che voressimo,

questo xe queo che

ghemo fato co tute

e nostre invension

e me incorso che a xe 

na gran confusion.

No se se sia meio desso o na volta,

quando se alsavimo col scuro

par ndare a lavorare

e tornavimo co xe scuro.... strachi,

ma co a voia  de sentarse a toa

co a propria fameia.

Desso se va casa se se canbia

e se core via, parché 

bisogna vivare a note,

a se demo na calmada, 

soo quando che ghemo calche magagna

ma o stesso ghe xe calchedun

che se lagna,

e no pal mae ch'el ga, 

ma par queo che da fare

el ga assà.....Mah!

Venare 28 setenbre 2018  

Carissima S. e blog.

                                 che coincidensa 28 del 2018 do numari co finae 8, chissà ch'el sia on bon augurio pal  Corso par Vooantari e sinpatizanti A.V.O., che scomissia stasera 28 ae 8 al'Ospedae Madre Teresa de Calcuta. Spero che ghe sia xente de bona voontà che ga voia de dare un paro de ore a setimana par portare un soriso, na paroa bona e un poca de conpagnia ai maà ricoverà. Nialtri Vooantari no femo gnente de speciae, a serchemo soo, co a nostra prezensa in divisa, de incuriosire i maà e cossì magari par un momento i se desmentega queo che i ga. Queo che femo ormai da quasi trenta ani, o femo voentieri, gratis e sensa metarse in mostra, ma soo par fare sentire manco soi i maà, che tuto il dì no vede altro che dotori, infermieri, medissine. Come che go dito gnente de speciae e penso che no sia far mae. Tante volte a se sentimo dire che no femo gnente, ma nialtri no ghemo da fare, a ghemo soo da stare vessin a chi che xe ricoverà, che tante volte no i ga nessuno che i và a trovare. Tanti, anca i familiari, ne dise che podaressimo darghe da magnare, ma nialtri podemo soo preparareghe a roba e starghe vessin, parché inbocare no xe senpre fassie, i maà no xe ochi da incoconare, ghe voe taticae questo poe e ga da farlo el personae ospedaliero che xe sta preparà. Carissimi, se podì vegnì anca valtri che no e xe do ore perse, ma guadagnà parché, quando ve saudé co oci boni co un maà, ve assicuro che ve fa stare ben.

Bona giornata!

Ghe nè passaà de aqua

soto ch'el ponte,

come che xe passà tanti ani,

ma come i ghemoi passà:

"Ben o mae"

Se ghemoi ricordà 

de vardarse al specio

e de dirse che semo contenti,

ghemoi fato cressare ben i fioi

e semoi sta ben in fameia,

se ghemoi ricordà

de ndare a trovare i maà...

se no o gavemo gnancora fato,

a ghemo un co a possibiità

de fare el Corso A.V.O.

de Voontariato.

Zoba 27 setenbre 2018  

Carissima S. e blog.

                                stamatina a ghe xe na luna ciara, bianca come el late, stanpà sul ceo azuro destirà su tuto queo che i  oci riesse in ceo a vedare soto sto ciaro de luna.Anca mi go " ....a luna", no go dormìo ben .....Forse parché ieri go vudo da dire in casa......Penso che ve capita anca valtri calche volta de stare cossì......quando che se parla, se alsa a vosse e no se sé capisse pì, tuti voe avere rason e se  sé assa col muso ongo.....Eco parché  stamatina no go gnente in testa, no so cossa pensare e se penso a fasso soo un mucio de confusion, sercando oncora de avere rason.... Còssi scomissio sta giornata sensa voia, co a a facia scura e co  a testa piena de tuto e gnente....Avanti xente che el dì xe pena scomissià....................

Bona giornata!

Me manca e passegiate....

da un poche de setimane

no camino..... co sti zenoci

che me fa mae.

Desso.... camino camino pian pianeo 

in mezo a é foie cascà par tera....

A vardo i albari che i xe 

ormai quasi nudi 

come a me testa voda de pensieri....

Par zonta desso xe anca fredo,

ormai l'istà a xe ndà,

e l'autuno e l'inverno

a so sicuro che a stare meio 

no i me iutarà.......

Mercore 26 setenbre 2018  

Carissima S. e blog.

                                  stamatina a penso a do robe, una a xe pensando  a tute e Associassion che ghe xe, che é xe massa e perde colpi. E xe come che na carovana de camei, che pa à strada se ne ferma uno, cossì el cargo el vien messo su e gobe de i altri. Strada fasendo i ghe ne perde naltro e a roba a vien cargà su st'altro....e cossì via....fin che quei che resta i xe cossì carghi che no i ghe ne poe pì e anca ori i xe costreti de moarghe. Ndando vanti de sto passo, anca e Associassion se no e trova dei altri Voontari e xe destinà a morire, ecco parché ogni ano a vien fato un Corso par aspiranti Vooantari, par sercare de trovare de a bona xente che se sente de stare vessin a chi che sta mae ricoverà in ospedae. St'altra roba a xe quea che go sentìo pa a teevision dai BLA...BLA...,che anca se go da ricossare che noi xe fassie fare ch'el mestiere, no i fa gnente par fare lavorare ben a so suca, parché i sta pì tenti a so pansa. Anca ieri sera i se ga riunio par parlarse tra Nassion che e vien ciamà O.N.U. ma che tanto unìe no e me pare, parché tutte e varda el so ortesèo, prorprio come e Associassion....Me domando se xe possibie che i governanti i se riunissa par parlare (che a xe na bea roba....) ma no i trova mai mai na soussion par fare star meio a so xente. Basta che vardemo queo che xe drìo capitare co i emigranti, e no parlo soo del'Africa, parché i scanpa da tutti i Paesi...sti qua i parla soo de schei, ma no par fare scoe, ospedai, case, strade etc....etc..., parché quando che i schei vien messi fora da tuti  (anca da Italia) par fare ndare vanti tante BARACHE, questi i vien dà par altre robe come sciopi e bonbe....Tuti va Nova Iorc par parlarse e trovare soossion, ma no par trovare a maniera che a so xente staga ben a casa sua, ma soo par farse vedare e portare e so rason e creare confusion ....a me pare na gabia de mati. In poche paroe, se e Nassion che sta ben e va in giro pal mondo a traficare, e ga prima de tuto portare pan e lavoro e me ripeto, NO ARMI! Stamatina vago al Santuario del Tresto pa a Messa co i maà e pregarò a Madona che a ghe diga a so FIOO ch'el fassa calcossa.....

Bona giornata!

Vardo sta fotografia

e me vien tanta nostalgia

de ch'el tenpo.... quando 

a spetavino el caretin dei geati,

a zugavimo a baete,a a cuco e tegna,

co poco ....a se divertivimo come mati.

Un co a ghemo de tuto,

magnemo in pressa ,

se vestimo ben, ndemo in machina

e se  divertimo co a musica a tuto voume

spotaciemo col teefonin,

ma semo in un gran casin.

Marti 25 setenbre 2018  

Carissima S.  e blog.

                                  stare siti e scoltare co atension xe na bea roba  da fare, se inpara e se vede tante robe, come quando se ndava a scoa, che se te stavi atento a queo che diséa el maestro te geri bravo e te ciapavi un bel voto, se no te restavi un sucon e nea vita te giravi come un pantaon. Anca ai me Voontari A.V.O. ghe digo senpre : - quando ndè dai maà saudei col soriso se vedì che podì farlo, se no doparè i oci, el corpo co na bea pozision, fasendoghe capire che si vegnù a trovarlo, ma sopratuto, s'el ga voia de parlare, scolteo....scolteo.... sensa distrrassion, parché el maà el se incorze subito se pensè a iù ao calcossa de altro.... - Cossì a fè e sì Voontari, parché se no vegnì soo a perdare tenpo che podaressi restare casa a fare calcossa de altro. Vardare e scoltare par podere vivare, a xe na roba che fa da senpre tute e creature su sta tera: - i animai che i scolta e i sente  i podaria chi e cossa magnare, ma anche stare tenti ai nemissi che xe drìo rivare; cossì l'omo che vede e scolta el canbiamento del tenpo par ndare o stare fora de casa, par somenare, par rancurare e par tante altre robe par continuare a vivare....- Un co no se scolta e no se vede pì gnente, parché l'omo ga fato e fa de tuto par essare e avere tuto sensa fadiga, no ghe xe gnanca bisogno de vedare e scoltare, parché a propaganda a xe continua e se magna tuto come e sarese: - Una drìo altra -. Chissà come e quando se sveiaremo e tornaremo a scoltare el vento e a vedare e stee.....

Bona giornata!

A farfaa a vive soo 

par poco tenpo.

Par vivare

a  scolta, a sente, a snasa....a magna,

anca l'omo par vivare,

par tanto tenpo, el ga fato cossì,

ma el ga anca fato de tuto

par no fare fadiga

e cossì de robe el se ga inpinà,

col riscio de restare sofegà. 

Se n'ol sta atento

a queo ch'el fa, el se trovarà

doman

coe braghe in man.....

Ma sta roba quanto che a dura....

Sveia....sveia che xe ora.....

Luni 24 setenbre 2018  

Carissima S. e blog.

                                  anca setenbre xe drìo tirare e ache, e scoe xe scomissià, dapartuto ghe xe sagre in quantità: Vanso - Marendoe .  Parochia del Redentore - Garzegnan -Tresto , chissà  quante che ghe né in tuta Italia, par no parlare de tute e manifestassion che se inventa tute e Associassion....tuto xe bon e xe beo par stare in conpagnia. A fameia però no xe pi quea de quando se magnava ch'el poco che se gavéa, se se passava i vestiti da un puteo altro, anca taconàa e coe pesse e a feste e sagre se ndava tuti insieme apiè, in bicecreta o in careto.... Me dirì che so vecio e che vardo indrìo, sensa vardare vanti e quante robe che xe sta fate par fadigare manco, magnare de pì e meio, vestirse ben e ndare a feste e sagre in machina, assando a parte el triboare che se faséa, fredo, fame e tuto el resto. Però el progresso ga portà anca el sconquasso né é fameie che in poco tenpo, fioi o no fioi e se spaca, cossì feste e sagre e ghe xe ogni dì, parché a pare moltiplicassion de é fameie, come  el pan el pesse ...sensa vardare a fadiga che se fa par taconate queo che se ga. Mah! Gera meio ieri o un cò....a no voio pensarghe e tiro vanti dì par dì fin che vedo sto ciareto....cossi ve auguro de vedare el ciaro ogni dì, par tanti dì anca valtri.

Bona giornata!

Ghe iera aqua

che a se ga secà;

che iera a fameia

che a se ga sfantà;

ghe iera l'Africa à

che desso a xe qua;

ghe iera l'omo e a dona

che se sposava,

desso  ghe xe fameie

de omani co omani,

done co done,

putini che né xe manco

ma avanti...avanti

che ghe sarà un mondo

de can....

Domenega 23 setenbre 2018   

Carissima S. e blog. 

                                   xe oncora caldo, ma el ceo xe scuro e me sa ch'el porta davero l'autuno, basta che n'ol sia inverno.....va benon! Ieri go tolto un tachidol par sto fastidioso ame ai zenoci, ma no no me passà gnente, speremo che i me ciama pa a visita antalgica e che i me fassa calcossa.....Ma asemo stare e me magagne, vardemo e robe bee, come le concerto de ieri ae siè de a sera , ch'el gera titoà. " CONCERTO DI FINE ESTATE"....quatro bravissimi maestri de vioin, che i ne ga cocoà co e so musiche sonà a arte, me so divertìo, anca se no so sta à fin a fine, parché gero in bicicleta e sicome elceo gera drìo scurirse a so tornà casa. Un cò vien festegia San Pio da Petralcina, un Santo che no go mai visto tanto bene, ma che nel mondo el xe portà tanto in alto da metarlo su i altari vessim al PARON. Me vien in mente che l'ano, gera el 1973, co a Maria, so sorèa Luisana e na amiga, a semo ndà zo in Pulia a Pecshici, e tornando indrìo a voevimo ndare su a San Giovani Rotondo, ma a xente del posto a ne ga sconsilia, parché gera drìo rivare un grosso tenporae e quandoa strada gera bruta par rivare fgin in sima, cossì non ghe so gnaca ndà.  Quando nel 2002, a Maria se ga maà a voevo ndare da Pdre Pio, che n'ol gera gnacora stafato Santo, par domandarghe de iutarla, ma no ghe so mai ndà e fin desso no go mai podesto ndarghe, chissà mai se ghe ndarò, come anca al Santuario de a Madona de La Salete, dove ghe xe sta a Maria nel 1996. Dopo sti ricordi, ve conto queo che fasso un co: - fra poco ndemo Messa dai frati, che i ciamo cossì anca se no ighe xe pì -  dopo magnà conpagno a Gema da so zia  che a festegia el conpleano: 96 ani , tuta piega de vita, ma oncora co tanta voia de vivare - stasera, se no nxe bruto tenpo, vago a éà Stortoa che xe a sagra e cossì passo a domenega che auguro anca a tuti de passarla ben.

Bona giornata!

Sto ano xe sento ani

che xe finìo a prima

guera mondiae

e dapartuto a vien ricordà, 

come anca qua. 

 In magio xe sta messa na targa

sul monumento ai soldati

morti in te che a guera maedeta,

che l'Italia ga vinto,

a Patria xe sta liberà, ma col sacrificio

de tanti povari soldà

che no i saveva gnanca par cossa

 a conbatare i gera  sta mandà. 

Se dise che par aver 

un futuro bisogna che ghe sia 

un passato e un presente,

ma me pare che un cò

nea testa dei omani

no ghe sia proprio gnente,

parché se vive a giornata

come un fiore che se cata..

Sabo 22 setenbre 2018  

Carissima S. e blog.

                                  ieri sera so nda a vedere na comedia ne a scoa del'Istituto Tenico Kennedy, dove so sta scoa  anca nei ani otantae me so diplomà ragioniere al serae. Me so comosso vedare oncora tanti tosi che va scoa serae. In prinsipio, in paestra go scoltà Vaandro che ne ga dito che questa xe na comedia regaà dal Grupo teatro de Ospedaeto Euganeo, par ricordare che un co a xe a giornata dedica ai maà de Alzheimer. Dopo a gheno visto e scoltà dei bravi interpreti che ne ga fato divertire co a Comedia. " IN FAMEIA SE BARUFA" scrita e direta dal me  bravo amigo Francesco Chiodin, ch'el xe sta anca Presidente del'AVO de Este, cossì o go saudà e ghe go dà un picoo aiuto par continuare a publicare el giorneto " FIORI DE TESTA" che fa parlare e parla dei maà che viene iutà dal Centro Solievo de Ospedaeto. Questo xe un posto dove che i maà de Alzheimer i vien portà a matina dai so familiari par dotre ore, cossì i poe fare altre robe, parché a ghi da savere che starghe drìo a un maà cossì se va davero " FORA DE TESTA", e co che el boetin " FIORI DE TESTA" el xe un sinpatico omagio a sti maà. A comedia xe sta bea e me so divertio un pasto. Stamatina. Un co no so cossa che farò, a giornata xe bea,ma no vago a caminare, parché me fa mae i zenoci e no so quando che i me ciamrà par farme a visita, spero presto, parché quando ch'el mae ghe xe no se sta ben e se ga poca voia de tuto, anca de scrivare, come che ghi visto nel RIME...DIARIO de ieri....

Bona giornata!

Oseeto 

cocoà su sta rameto,

quanto beo sito,

te zoi da na pianta altra

e te té godi el dì,

parché el Paron 

el te ga fato cossì.

Invesse mi

a stare drento in casa

a me sento come ti

che i ti quando te sì in gabia,

a sò scuro in facia e pien de rabia

de no podere godarme

ndando a passegiare

par l'arzare del canae, 

parché a so pien de mae.

Vénare 21 setenbre 2018  

Carissima S. e blog.
                                  un co xe San Mateo, o go festegià ieri sera a Vanso con na magnada de bacaà soyo el capanon, ma stanote gavevo el stomago in brontoon, ma stamatina so oncora qua, tardi ma sicuro....Continuo co contarve e robe de na volta :

              pian pianeo riva autuno, come  el  soito, desso se metemo na maieta pì grossa, ma el soe scalda oncora e fa caldo, xe meio un cava e meti a seoa. Vessin al giardin de na casa a sento un bon odore che me caressa el naso, el xe a pianta de  salvia col so verdin smarìo e del so profumo me so inpenìo.  Provo a fare na passegiata co i zenoci che me fa mae, camina...camina...so rivà al Moraro, a via dove che so nato e so vissù par venti ani dal 1941 al 1961. Come senpre me xe vegnù un gropo in goa e col pensiero so tornà indrìo. A me poso su a ringhiera del Ponte de a Groa e vardo el Canae Bisato, dove come un specio el me fa  rivedare tuto el tenpo che xe passà co e case, a xente, a fame, el fredo, e stagion, che go spartìo insieme ai me amissi da quando che gero puteo fin a quando so deventà omo. Tiro un sospiro e a oci verti a scomissio a ricordare....dove che so desso che gera na passarèa de legno, che passavo par ndare a scòa, senpre de corsa, d’inverno coe sgalmarete e d’istà a piè scalsi, parché e scarpe e gavevo sul coo coe i spaghi ligà par no consumarle, a me e metevo co rivavo in via Garibaldi, prima de ndare drento in scoa, se no el bidèo el me brontoava. Un dì corendo parché no voevo fare tardi a scoa, a so scapussà in te na toa dea passarèa che se gaveva sciodà e me go sbroià na ganba, ma go continuà a corare parché me pareva de vere sentìo a canpanea sonare. Co so rivà el bideo gera drio sarare el porton de a scoa, ma mi gero sensa fià e ganba gera insanguinà, cossì me so sentà davanti a iù su i scaini, el me ga vardà, el se ga cavà el bareto e dopo averse gratà in testa el me ga tirà su, el me ga portà in bagno e co un poca de aqua trata dal rubineto del lavandin, el me gà netà el sangue dea ganba infasandomea con un toco de pessa neta, de que che’l doparava par furbire, dopo serio....serio el me ga conpagnà fin su a porta dea classe, la ga batù e quando amaestra ga dito....vanti, col bareto in man el me ga mandà al me posto sul banco de legno, tuti i tosi me vardava e a maestra co i ociai sul naso a me ga dà na ociada che a me ga fulminà, cossì go sbassà a testa e me so quatà sul banco.

DAL PONTE DEA PESCARIA

….vardo co nostalgia

sti posti  e me ricordo

de quando che iero putin

A eora nel canae Bisato

se noava  se pescava

e se lavava e arte

nel’aqua ciara

‘Deso  da sto ponte

vedo na gondoa

tacà a un pao

che ea dondoa

sul’aqua scura

che no se vede el fondo

e che vorìa someiarghe

al canal grande de Venesia

Ma invese un co’

no se poe pì noare

pescare né lavare

el xe soo un ricordo

da no desmentegare.

Da sto ponte

Go visto

Pasare tanti careti

Tirà da musi e cavai

Che zà i faséa fadiga

A fare ea caà dee vae.

Da sto ponte

Da sto marcheto

A pionbo a voo a sgiansi

Go fato tanti tufi

Indrìo e in vanti.

Da sto ponte

Xe pasà ea zente de Arquà

Coe seste portà col bigoo

Par vendare al marcà

Mandoe fighi zisoe

E pomi ingrana.

Da sto ponte

D’inverno col giaso

A go isegà

Coe sgalmare inbrocà

Fin in piasa e anca pì in là

Da sto ponte

Xe  passà tanta xente

Par ‘ndare in pescaria

In Comune o a fare spese

Dal botegaro dal fornaio

e dal becaro

Da sto ponte

Xe passà la procession

Del Venare Santo

Co davanti la Crose

Drìo i puteli e le putele

divisi in do file

ghe jera le Confraternite

Con i so labari

Drìo vegneva i chierichetti

E i cappati che i portava

el baldacchin

cò soto el Prete

Co lal reliqia del Santissimo

Pi indrìo ghe jera

Longhe file de done

Che le prime jera za in piassa

E le ultime iera ‘ncora al “Cavallin”

Da sto ponte

xe passà camion

E machine a brondoon

Tubi del’aqua dela luce

E del gas metano

E xe par questo ch’el ponte

Se sta mezo sconquassà

Da sto ponte

Finalmente un cò restaurà

a vedo la xente

Che lo varda incantà.

Zoba 20 setenbre 2018 

Carissima S. e blog.
                                  ieri sera go magna na pissa e stanote go dormìo poco emae, a é sete me so alsà e so nda Messa da é Carmeitane. Desso so qua che ve scrivo, ma no so cossa scrivare;  ve conto in versi el tenpo de quando che gero puteo

A me rivedo

Sull’arzare del canale

Co’ le braghete curte

Co’ le tirache

Fate co’ un toco de tabaro

De me nono

Calse e maia  fate a feri

Tuta opara de me mama

E sgalmarete de legno

Fate da me popa

E anca el sciopeto de legno

Ch’el me ga fato

Co’ le so man e na

 foto de Mosseese

co a Cesa de San Paolo

a me ricorda co faséa  el zagheto 

che me inpenisse de teneressa

de malinconia e tanta nostalgia.

Mercore 19 setenbre 2018  

Carissima S. e blog.

                                 ieri sera me so trovà co i amissi del Concorso de poesia " Il Poeta eil Narratore", un Concorso Nassionale, che in qualche modo go fato nassare mi, ma xe sta ciapà in man e portà vanti come ch'el voe da Davide. Un toso inteigente e bravo a smanegare co sto coso qua. Ormai da diversi ani el vien fato e ghe xe xente da tuta Italia che manda e so opare a sto Concorso, che de soito el vien premià nel mese de Novenbre. Tra i dosento opare poetche che xe rivà, ghe nemo tirà fora na ventena e desso a ghemo da rilesarle par seliarne sinque e si se trovemo ai primi de otobre. Come che go dito Davide fa tuto, el fa, el desfa, anca a giuria a xe cambià e dentro a chi che giudica e poesie ghe xe do tosi novi: Valter e Francesco, tuti do fa parte anca dei Poeti dea Roca in Fiore, ma no o savevo e me i so trovà ieri sera a casa de Paolo, che oramai da tanto tenpo  el se presta a ospitarne nea so bea casa de Possonovo.. A Francesca, a moiere de Paolo, a ne ga preparà na bea e bona torta margherita e co un bon goto de vin bianco portà da Giovani, a ghemo fato mezanote. Nea vita ghexe de é coincidense che no té té speti, cossì ieri sera parlando co Giovani, go savesto che so fioa a sta a Grenoble in Francia, a éora ghe go domandà s'el conosse el Santuario dea Madona de a Salete, el me ga dito de sì e a Grenoble ghe xe tanta devosion par sta Madona. Stamatina, come ogni dì,  versendo sto bussooto a go trovà che proprio un co xe dedica a éa Madona de a Salete. A me xe vegnù un gropo in goa pensando a Maria, che a ghe xe stà tornando da Saint Jean Pied de Port, dopo che a me gavéva conpagnà a éa me partensa par Santiago. Co soi tornà Maria a me ga contà de sta Madona e go dito che ghe saremo tornà insieme, ma invesse EL PARON a sea ga portà in ceo a vedare a Madona de persona......

Bona giornata!

A Madona de a Salete

a se ga presentà a do putei

na ventina de ani prima de Lourdes.

No a xe tanto conussua,

parché el santuario 

el se trova tanto in alto

e xe difissie portare

tanta xente  

in mezo a che a montagna,

cossì ghe va i cristiani

de sta parte de a Francia

e dal mondo vien pochi peegrini.

Questa a xe a storia

del me desiderio che

 sarà diffisie che se avera,

ma che me restarà 

par senpre in memoria,

 finchè un dì, spero....

no podarò co Maria 

vedarla davero.

Marti 18 setenbre 2018 

Carissima S. e blog.

                                 ieri, verso sera el ceo ga scomissià a scurirse, ma no xe xasca tanta piova. Stamatina a xe nuvooso, ma xe tuto incantà, a pare che se sia spetando chissà cossa, ma qua da ste parte, semo bastansa fortunà, parché no capità mai grossi disastri e speremo che a continua cossì. Invesse in giro pal mondo a se vede distrussion e morti e penso a che-a pora xente che i resta sensa gnente. Par chi resta a vita continua e se fa su e maneghe par scomissiare de novo a metare in piè na vita che no xe pì quea, ma che bisogna ndare tirarla vanti, no come che i stupidi che i continua a conbatare e a quei che fabrica e armi par fare quatro schei a ghe digo, che no xe cossì che i deventarà pì bei, prima o dopo i assà qua tuto queo che i ga mucià e i sarà ricordà pa- a cativeria che i ga. Xente che a paroe dizì che fè, ma nei fati no fè gnente, xe ora che ciacoè manco e ve dè pì da fare. Tuti xe boni comandare, rafare, magnare e girare el mondo co na bea sacheta piena de paroe, ma ghe xe xente che speta de essare iutà davero, no soo a paroe.

Bona giornata!

A vardo sta fotografia

e me vien tanta nostalgia,

del tenpo che e mame

se toeva el tenpo de fermarse

a zugare e parlare co i putei,

a spignatare su i fornei,

 preparare da magnare,

lavare, stirare e scoare.

El tenpo che in casa 

a se viveva in tanti

e in toa che gera senpre

un piato in pì,

parché no se mai che calchedun

passasse e se fermasse chi.....

Al tenpo de un cò

no te sveia el ciaro,

ma a sveia sul comò,

te sì senpre de corsa,

el tenpo xe na morsa,

che strense senpre de pì

e senpre pì curto pare el dì.

"Il tempo è denaro"

dise l'avaro,

pare che n'ol sapia

che in boca no ghe restarà

che l'amaro.

Domenega 16 setenbre 2018  

Carissima S. e blog.

                                 un co qua a Mosseese xe festa granda,...e 9 Contrade fa a sfiata in costume nedievae e a Quintana nel canpo fora de-é mure verso Parnumia. Un canpo che vien doparà na volta al'ano e ch'el Comune paga un mucio de schei al so paron, no capisso parché no i o gabia conprà e parché no i sfruta in calche maniera tuto l'ano, invesse el vien doparà a setenbre pa a Giostra dea Roca e a novenbre pa a sagra dei Santi. Secondo mi i podaria fare  alenare e fare de-é gare de cavai bona parte del'ano, opure fare dei concerti.... bastarìa tegnerlo netà e messi cessi, spoliatoi e ristori, insoma sfrutarlo, no assarlo éà par dopararlo do volte l'ano. 

A mezodì ndemo da Giovani a magnare par festegiare el so conpleano, dopodisnà se xe na bea giornata a provo ndare a fare na passegiata, parché me sento bstansa benin, anca se sùo co gnente, a penso che sia colpa dei antibiotici, ma doman finisso a scatoa e vago dal me dotore, s'el xe tornà dae vacanse e ghe conto queo che me xe capità......Sta setimana a go un mucio de robe da fare e spero de avere a voia e a forsa par podere farle tute: Incontro OFS  - letura deé poesie Concorso -  da Luciana par preparare calcossa par Nadae e diretivo A.V.O.  - diretivo  dei Amissi de Santiago - libreti de poesie dei Poeti de-a Roca in Fiore - al Kennedy comedia de Francesco Chiodin par Alzheimer - Convegno Regionae A.V.O. a Mirano -, sensa contare queo che ghe vien in mente a Gema, parché a podaria farmene fare calcheduna de manco de tute ste robe.......

Bona Giornata!

Ma dime ti se l'omo

n'ol xe  pì stupido de cossì,

el dise, ma n'ol fa,

queo ch'el fa el lo desfa

ogni volta ch'el canbia governo.

N'ol ga mai inparà calcossa

dai sbali ch'el ga fato,

el fa soò e fusa come un gato

par trovare i ochi

che i o vota e tegnerse

a carega.... a pare ch'el no  sapia

che prima o dopo el ghe 

moa par forsa

e intanto el Paese

e xe messo in morsa

e batù come un bacaà.

Chissà mai quando che inpararemo

a tegnere conto de queo che femo,

de vedare e tegnere soò e robe bone

e butare a ramengo tuti quei
che i pensa soo a fare
i afari sui.

Luni 17 setenbre 2018  

Carissima S. e blog.

                                 ieri a giornata de soe e a Giostra dé a Roca in ga portà a Mosseese na marèa de xente, ma no tanta come altri ani, parché nei paesi vessin i fa anca ori dé e bee manifestassion e a xente a selie queo che ghe piase de pì o che a xe curiosa de vedare robe nove. Ieri semo ndà a pranso da Giovani a Este, dove in piassa ghe gera el raduno dé e machine vece....a gera un boto e Fabio co a so fameia no gera ncora rivà, ma quando ch'el xe rivà e ghemo visto co a facia sbroià, parché el gera casca in bicicleta vegnendo zo dal Monte Cecilia, che anca mi go fato, ma no ghe so pì ndà parche a starda in dissesa a xe pericoosa e tanti cani che me ga sbaià....Speremo che stanote el se sia repossà e non ghe vegna fora e bote ch'el ga ciapà, parché un co el possa ndare a lavorare, parché el lavora par conto suo e da soo....San Bortoo ga vinto a Quintana e San Giacomo ga vinto a sfiata, a Giostra de a Roca xe finià co a consegna dé a "STRASSA" in Piassa a éà Contrada de San Bortoo e dopo a xente ga mirà a Tore incendià...Go oncora e ganbe che me fa mae, el mae in bocca  me xe bastansa passà e stamatina vago a fare el me Servissio all' A.V.O. - ACCOLIENSA....

Bona giornata!

A Giostra dé a Roca

a xe na bea manifestassion,

ma ghe voe tanta organizassion.

I capi contrada i ga 

el so gran da fare

e par tuto l'ano i ga 

da lavorare par sercare

e prepare a xente

pa é varie gare.

Ogni ano a Giostra  de a Roca

a se presenta co dé e novità

par fare divertire a xente

che vien né a nostra cità.

Sto ano me pare  

che ghe né sia manco, 

a sarà a me inpression, 

ma go visto manco confusion.

Comunque sia 

a xente dé e Contrade

a se ga divertìa.

Ai Vinti e ai vincitori  e ai organizatori

ghe va batiman  e onori.

GRASSIE !

Sabo 15 setenbre 2018 

Carissima S. e blog.

                              anca un co te ringrassio cara S. pa e bee paroe che te me ghe scrito e par spensarme a continuare a scrivare. Come che te vedi o fasso in diaeto, parché se calchedun lezarà sto RIME....diario el possa continuare a portare vanti e paroe che ghemo inparà dai nostri veci....GRASSIE S!

                                     Ieri sera go provà ndare a fare na picoa passegiata e go visto a luna in cressare, come che se dise:"Luna co a goba a ponente luna cressente", par questo sdo ndà nel lunario a vedare cossa che i faséa i contadini in te sto peiosdo: - i vignaioi sa che i ga da lavorare e inbotiliare el vin frizantin, parché el vegna bon; nei campi se cata i pomi, i peri, i fighi e se pianta e fragoe; nel'orto se speta a luna piena par trapiantare fenocio, radecio e cicoria, pò se speta a luna caante par piantare meansane, pevaroni, pomodori, cetrioi, suchine e catare séoé, patate, mandoé e nosèé e pò preparare a tera par piantre  a verdura autunae; in giardin xe ora de metare el consime pa e begonie e tagete, caendue e nastursi, sensa desmentegarse de trinciare e bruscare e rose. In te sta stagion se dise  de stare tenti che: " Comare e preti porta pensieri". 

Bona giornata!

LUNA

a te go vista, te geri in cressare,

 bianca come na fétèa de coco,

col ceo blu che te fa sèa da cornise,

ma.... come che te go rivardà

a te ghevi messo do camise,

una de coore naransa

e st'altra coro limon

e go pensà che no gera

un segno bon.

Cossì xe sta, parché stanote

ga squasi tenpestà,

a é-ora  a go pensà

che a vendemare no se ndarà,

parché a tera e a uà e xe bagnà.

I veci gheva rason a vardarte senpre

sensa mai desmetnegarte, 

parché da come che te sì

i faséa e so arte.