Carissimi,
me sò sveià bonora, iera e 6. On bon cafè e via in braghete curte e canotiera, ma fora da a porta go sentìo fresco e so torna indrìo a torme na gabana. Sora l'arzare stavo ben inbacucà, ma dopo calche sentenaro de metri a go dovesto cavarmea e me a so portà drìo par 2 orete. Non ghe iera tanti caminanti, ma go trova a Daniea col cagneto de so fioo. Ghemo fato on toco de strada insieme fin a Marendoe e go portà anca mi par on tochetin el cordonsin de a cagneta. A Marendoe a go lassà parchè go continua fin a Cà Barbaro. Tornando indrìo me xé vegnù mal de pansa e me so fermà soto e frasche prima del ponte dea cementeria. Dopo avere libarà el pantasso a go continua a caminare zo pa e stae. A e 8 iero a casa, iero straco, ma contento de avere fato 8 kiometri dopo na diesena de dì de fermo.
Bona iornata a tuti!
Vardando ste raise
a go pensà
de scrivarve in diaeto
che go inparà
da e me raise
Vardado ste raise
me xé vegnù in mente
tuta che a cara xente
che me ga assà
e me so sentìo come
on can bastonà
Se vago indrìo nel tenpo
a me ricordo
tante de che e robe
che go passà che go fato
che gavarìa voesto e podesto fare
e no go fato
No me pento de gnente
desso me trovo
vecio e sensa gnente
ma spero de non avere
vissù par gnente.
Nessun commento:
Posta un commento