Carissimi, oggi vi racconto di ieri, perché domani accompagno Gino al camposanto, un altro pezzetto della mia gioventù che se ne è andato lassù.

ADIO GINO

‘Naltro toco del Moraro che ne assa.

Gino, fjoo de a Mora e anca iù ciamà Moro.

El jera uno dei tanti omani del Moraro,

sempre in jiro a sercare lavoro,

mentre e done e tendeva i putei,

e lavava e arte nel canae,

e faséa da magnare.

A nostra strada a jera

soto el canae Bisato.

Longa poco pì de dosento metri,

dal Ponte de a Pescaria,

al Ponte de a Groa.

E case, una tacà altra,

a sinque metri dal’arzare,

ch’el gavéa tre scaete

par ‘ndare sora

e  zò fin al’aqua.

Na aqua linpia, quasi da bevare.

Dove  se lavavimo e dove

ghemo imparà a noare.

Anca Gino el se tufava

so sta aqua, el se godeva,

anca s’el parlava poco

a  ghe piaséva  a conpagnia.

I ani xé passà e anca Gino

come tanti altri el xé n’dà,

ma a via Moraro a xé ncora qua

e fin che calchedun de vecio ghe sarà,

o che da ste parte el tornarà,

anca de Gino el se ricordarà,

parché sta via de pora zente

a jera come na fameja,

dove se se jutava, se pianseva,

se barufava e sé se godeva

co’ poco o gnente,

piena del  core de tanta bona zente.

CIAO GINO!

Mosseese 28 jugno 2014