A Cresema

Carissima S. e blog, domenega 17, a matina Ana ciapa a Cresema, dopodisnà Marco anca iù vien cresemà, vago a vedarli tuti do prima de 'ndare a recitare ne a Lojeta. Pensando a quando ca so sta cresemà mi, me ricordo ca jerimo nel Domo Vecio, in te do fie de banchi sempre longhe, saremo sta pì de sento putei. Da 'na parte a ghe jera e tosete e da st'altra i toseti. De drìo gavevimo i santoi, tuto soto ocio de don Joanon, ch'el voea fare bea figura col Vescovo Bordignon, on frate capucin co a barba longa, ch'el gavéa on bel fare. A Cresema a jera na festa granda, par chi ca gavéa a femeja che stava ben in saute e in vaute, parché el santoo el regaava l'oroojo, invesse ae tose a ghe vegnéa regaà a coanina o el braciaeto. Invesse par mi ca jero on poareto a gavevo on santoo che me popà el gavéa catà fasendo el jro co a moeta a gussare i cortei ne e canpagne intorno a Mosseese, el se ciamava Scarparoo, a me o ricordo come ieri, parché dopo avere ciapà a Cresema, el me ga portà in ostaria dai Bacari, e cvome regao el me ga fato béare on vermute coi pandoeti, ca me so inbriagà e pa a strada tornando casa a go vomità. Cari pueti e ptee del d' de on cò, valtri a si fortunà parché a fè festa in ristorante, a gavì un mucio de regai da tuti i invità, ma penso ca si stufi de regai, ormai a gavì de tuto e no ve contenta pì gnente, e forse voressi avere pì libertà a zugare e basta. Ve auguro cari néodi de fare na bona Cresema e de ricordarve che el xé el Sacramento ch'el ve fa deventare soldà de Jesù e defendare a Fede in Cristo, par questo i ne ciama Cristiani. Bona jornata!